Reporter : Ikhsan Madjido
KAILIPOST.COM,- PALU- DAKOME Ri tanggala 20 sampe 22 Pebruari iriavi, maria taupu bo alima guru wakele doko rua pulu bo aono posikola SMA ri Palu nasiromu nanggavia soal USBN ri Auditorium Dikbud Sulteng. Geira hai nanggavia soal sacara mandiri anu nikoordinir MKKS SMA Kota Palu.
“Jadi, panggavia soal nidekeika ka MGMP. Apa nasipato ante Prosedur Operasional Standar (POS) anu nanguli MGMP manggavia soal mo musyawarah,” tesa Salim, Ketua MKKS Kota Palu. “Guru ri MGMP hi nanggavia soal sacara mandiri nopodoman ka panggavia soal no standar nasional. Soal-soal hi ngena rapasiromu ante soal-soal doko ri kabupaten supaya ma seragam,” tesana ri tempona nantarima soal doko ri MGMP ka MKKS ri Auditorium Dikbud, eo Kamisi (22/2).
Panguli Salim anu Kapa Sikola SMAN 8 Palu hi ane ri panggavia soal hi nisaromaka guru mompakule manggavia soal no mutu. “Batuana soal anu naria hots, mots ante lots. Tapi niakuiku lenk, guru-guru nompakule naggaviana, tarutama soal hots,” pangulina.
Salasaito guru dako ri SMAN Madani nanguli ane ia nadamba bo navangga ntoto nirasaina niparacaya manggavia soal USBN. “Aga hi sangu lenk, panggavia soal mpu-mpu na mandiri. Ledo ria doi mompakasadia ATK, apalagi doi transpor. Dako ri posikola mboto aga notanggulangi na,” pangulina Dahlan.
Ledo ria kandala ri panggavia soal, aga pangaku guru Kimia hi ane guru na sesa sakide ri kisi-kisi soal, apa na umum gaga. Jadi guru-guru mompolajari belo vai ruru.
“Kandala na aga anu sangu hai, kita mpu-mpu masiromu mo tesa belo berimba gayana soal rakavia bo ntanina pa,” pangakuna no tutui tesa.**
