SALES Ececitive Pertamina wilayah Sulteng I Bastian Wibowo nangaku deana gas elpiji 3kg rabagi eo-eo ka ngata Palu 12 njobu. Anu hie nitevaikana ka Kaili Post ri Whats Ap, eo Araba (20/6/2018). ‘’Naupu bula nggabuka stok elpiji tatalu kilo naama. Eo hie nompamulamo pertamina nosuaraka ri pangjalan na resmi riara ngata Palu.
Sakuya mbula naliu mami naperna nisuaraka ri sura kabar nakura ho nompene alina ka topo balu ri kios. Hai muni ledo nesua dako ri libo huku kami, apa mamala ra dekeika denda aga pangkalan. Tapi ri ngayona kami mpausahaka ala anu hai makuramo, ” pangakuna.
Deana pangkalan na resmi ri ngata Palu hie, Bastian nangulika 1.006 libo nu pangkalan. Nipekutanaka ala tona manggava gas elpiji 3kg mabutuka to kasi asi, ia notevaika morambanga ante pamarenta ngata Palu riara manggita ho mo awasi ala domo to masugi manggavana.
Nitevaikana muni ka todea ala mangali gas elpiji tatalu kilo ri pangkalan narosmi ato ri SPBU. Ala ledo masuli alina nasosuai ante ali eceran nalanga dako ri pamarenta. Apa ali ri kios-kios ledo namala rakontrol pertamina. ” Kami notevaika songgo poasi ka todea ri ngata Palu ka parcayana nompake gas elpij dako ri pertaminai, tarutama non subsidi. Kami muni notevaika mpu-mpu mompaka belo polayanan ka todea, ante mousaha mompaka ria nju gas elpiji ri ngata Kaili hie, ” pangulina.**
reporter: firmansyah
