RT ri Palu Nerapi Honor Ratambai

  • Whatsapp
banner 728x90
Reporter: Firmansyah Lawawi

KARAJA Katua
RT ri Kota Palu sampe eo hi aga nihargai satu njobu sambula. Anu hai muni
nitarima tau mbula sanggani. Samantara karaja ra nantamo, ledo nanggita waktu
ante kaadaan. Boito hai, todea nerapi honor nu RT ratambai sakide.

Sala sangu RT nosovodaka anu hi ka anggota dewan
ri tempo na po reses DPRD Palu ri Kalurahan Boyaoge Kacamatan Tatang, eo Sine
(28/1/2019).

“Tugas nu RT satu kali dua puluh empat jam. Samantara
honor kami aga savite. Itumo itu niperapi kami ka komiu anggota dewan anu
nakava eo hi mamala mompapola patuju kami hi,” pangulina.

Nosonggo perapi hai, anggota Komisi B, Joppie Alvi
Kekung nangulika, anu hai naupumo nijaritai ri DPRD. Ante nasaromo niepe ri
reses nggapurina.

Tapi riara urusa hai muni, DPRD Palu aga nosuaraka
petevai dako todea, ante anggarana nggo. Ane nopaka tantu programna, pamarenta
ngata. Eva BAPPEDA. Riara nobila-bila anu nisuaraka dako ante Dekot.

“Jadi, ledo pura-purana anu nisuaraka kami ra
ala pura. Apa sampe eo hie, ngata Palu narua 46 kolurahan. Niposabakamo hai,
rakita vai ruru APBD, kira-kira magana ngena ra potombo pura perapi dako ri
ampa pulu bo aono kolurahan hai, ” nitevaikana.

Roa sangu Komisina, i Ridwan Basatu riara
notevaika pekutana todea, nikaika kantoro Kolurahan Boyaoge nakura fasilitasna
bo dopa nipakabelo, nangulika anggaran nipaka tantumo nggauluna, nadea
nialihkan ka urusa ntanina. Niposabaka lingu 28 September naliu.

“Niposabaka lingu naliu, nadea anggaran
nisoro ka kaparlua ntanina. Niposabakamo hai, kuperapika ka todea ala mosabara,”
perapina.

Anu hai nasimbayu muni nitevaika wakele todea
Komisi B, Alimudin Ali Bau. Riumba todea nakocewa niposabaka da nadea dala ri
libora dopa nipaka belo. Ri kolurahan ntanina, naupu puramo ni aspal.

Pangulina, anu hai muni naupu puramo nijaritai ri
DPRD. Niposabaka nalingu, nadea anggaran nilinja ka kaparlua ntanina. Tapi
urusa hai kana ra tevaika ka kantoro natekai. Ala rakava solusina.

Nipekutanaka maipiamo mesuvu dana poganti ka todea
nakaraugia nambela lingu, balumba mbaso ante tana noenju ri ngata Palu, i
Alimudin nangulika dana hai nianggarkanmo pamarenta puse. ” Ane ledo
nasala, deana anggaran hai randua Trilyun labi. Nesuamo muni ante dana mobayari
tona namate,” pangulina.**

Berita terkait