PAMARENTAH Kota Palu ledo nenonto noaturu geira ri Tondo Kiri, naupu lingu mbaso bara sakuya mbula naliu.
Palaksana Tugas (Plt) Kapala Satuan Polisi Pamong Praja (Satpol PP) Kota palu, Nathan Pagasongan nanguli, PSK ante mucikari ri Tondo Kiri nasaro nosibaleba ante aparat ri tempo poaturu hai.
“Ane kami nopatroli, nikava kami ledo ria tona. Banua nipake na koso, leria isina. Nisanira ane kami makava. Nemo-nemo naria tona nangulika,” pangulina, eo Sine (24/6/2019).
Nadea usaha nikavia nompa aturu tampa asusila hai, minggu-minggu nopatroli ri kawasan eks lokalisasi Tondo Kiri, no karajasama ante polisi, sampe nanggavia sosialisasi ka geira na jadi PSK ante mucikari.
“Nadea nipeintaka kami tona no parkir motoro ri vamba pesua lokalisasi hi. Biasana polanggan hai. Nitongoraka kara kami manjili, pade geira nesua. Tapi biasana muni, nanjili mboto mo geira, apa kami nasae nonturo-nturo notesa ante todea ri Tondo Kiri hi,” tesana.
Naupa vesia, ledo naupu usaha Satpol PP no patrol ante nompadekei sosialisasi ka geira nitasere najadi PSK bo mucikari supaya menonto mo manggavia kainggua ledo nabelo hi.
“Ane eona, nalino biasa ri si, tapi ane bongina, sanimbotomo,” pangulina. Ledo muni niulina nuapa tindaka supaya matoba PSK ante mucikari nambongo hi.**
