Ngata Palu,- KEPOLISIAN Resort Palu nanggavia haja operasi Cipta Kondisi (Cipkon) ri eo Sabtu (10/6/2017) ri jam 22,30 Wita bongina, gunana mojagai kaamana ante mpakurangi anu mpanggavia doyo-doyo ri ngata Palu ri ara bula mpuasa sampe mabuka ngena. Operasi Cipkon nikavia dako ridala Gajah Mada, Ponegoro, Imam Bonjol sampe rid ala Cumi-Cumi. Kagunana ana muni ala mompasaka topo parkir ledo ria izina ato navura.
Ante kakuata kadeana 30 personil gabungan Polresta Palu dako ri Sat Sabhara ni potadulako I Kasatna AKP Noperto G. Nainggolan S.I.K, kasat Narkoba AKP Kiki Kristina, Kabag Ops Polres Palu AKP SuIardi SH, Sat Intel ante Sat Reskrim. Dako ri hasele nu operasi Cipkon hai, Polisi namala nosaka Aono topo parker vura.
Geira topo parker vura ka hai mpadekei ali nu karcisi parker ka motoro Rp.2000 ante Oto Rp.5000. Sanga-sanga geira hi: AS (58 thn), BB (39 thn), MJ (56 thn), SY (40 thn), AR (49 thn) ante RM (29 thn). Kepolisisan resort Palu naupu hai mpacatat sanga-sangara ante mompaka belo kaingguara ante nanggavia sura pernyataan kageira aono hai.
Kapolres Palu AKBP Christ R.Pusung S.I.K nepetevaika ka ana buana mpu-mpu molaksanaka Operasi Cipkon kagunana mokurangi kajahata ante mpajagai kaamana ri ngata Palu ri ara bula Ramadhan sampe makava Mabuka ngena. **
reporter: firmansyah
