Ngata Palu,- TODEA Ringata Sulteng 2017 notambai ka bahagiana 71,92 persen dako ri mpae 2014 nggaulu. Pondataan ri lapanga nikavia dako ri tanggala 5-30 April 2017. Panggavia pondataan SPTK Sulteng mambelaka 1.514 topo berei ri 13 Kabupaten/Kota ri ngata Tadulako, 155 blok sensus niala dako ri 10 rumah tangga ledo nanggita riara ekonomira. Data hi nikumpulu daki ri Kantoro BPS Sulteng dala Moh.Yamin Palu tinti 12.00 wita tempona no Press Release.
Ri 2014 metode nipake aga Sangu dimensi (kopuasan natuvu), ri mpae 2017 Tatalu cara nipake mpaukuru kobahagiaan eva kopuasan natuvu, porasaan ante batua natuvu. Indeks indikator nompaka langa kobahagiaan ri Sulteng(kohrmonisan koluarga) 83,88, anunompaka nau panggava topo berei 59,92.
Kobahagiaan eva ri umuru, umuru 24 thn 75,13, umuru 25-30 thn 71,85, umuru 40-64 thn 71,81 ante umuru 60 thn 72 porsen. ngana ri umuru riambe 24 nabahagia ntoto, sabane geira ledo ria boban katuvua, tapi naria nikava pola ledo nasimbayu eva indeks kopuasan natuvu ante todea, notambau nompene ritempona notambai umuru.
Indeks nabahagia ri libo ngata, toponturo riara kota nabahagia 75,60 dako geira natuvu ri desa aga 70,46. Niposabaka todea ri kota nagampa nanggava fasilitas eva hiburan, pokarjaa, ruma saki ante ntanina, tapi geira ri desa nalanga kopuasan natuvu sosialra apa nadea tempora mosinggava ante tona ntanina.
Ala ka status topo berei, geira dopa noberei nabahagia 77,55 porsen, nobereimo 72,06, nogaa natuvu 68,15, nogaa namate 69,89. todea dopa noberei nabhagia ntoto, niposabakana ledo riatona rapatuvu ante rapaknde. Tapi geira nogaa mate nanggava kopuasan natuvu sosial nalanga ntoto.
Sulteng nanggava posisi ka 14 dako 36 Provinsi natinggi kobahagiana. Partamana Maluku Utara 75,65, riambena tingka kobahagiana nambelaka Papua 67,52. Balengga Kantoro BPS Prov Sulteng ir. Faisal Anwar.MT riara mpetevaikana riacara press release nangulika anu mpaukuru kobahagiaan ri Sulteng ledo aga nikita dako ri ekonomi, tapi naria Tatalu faktor nompangaruhi eva kopuasan natuvu, porasaan (affect) ante momparasaika katuvua(eudamonia)” petevaikana.
REPORTER: FIRMANSYAH
