PALU,- SEKRETARIS Daerah Kota Palu Asri. SH nowakeleka Walikota notutui Puenjidi Kabonena Festival Nomoni 2017 ri Kel. Kabonena, Kec. Ulujadi Kota Palu tinti 20.00 wita. Haja nompakitaka budaya tana kaili ni kavia saena Alima eo.
nompamula dako ri tanggala 5 oktober, sampe 9 oktober 2017. Sala sangu nipakitaka eva tari Pomonte ni ikutu noatu tona. Haja mpatutui acara hai ni kakavaka muni topo dade ngata palu, eva Laila Bahswan, Masriani Syukri, Asosiasi Seniman Musik Indonesia (ASMI) ngata palu.
Riara sambutana Sekot nangulika songgo poasina ka Panpel, Camat, Lurah, Dandramil, Polsek Palbar, totua nu ada, tomalanggai, totua agama ante todea riara nanggavia acara nalancara ante naama sampe napumpu. Niulina muni ka topio tari pomonte, nambaso balenggana nanggita geira pura.
Nakavaopa niulina muni ka.ASMI, ala molati geira pura ngana kodi ka pomonte, ala ledo rakalingasira anu pomboliaka totua nggaulu. Ledo aga pomonte, tapi pomboliaka pura budaya nggaulu muni ra paguruka muni, ” Ane pomboliaka totua nggauluta ledo ra paguruta ka ngana-ngana pura, domo ratorara ka budaya pura hai, Kamai kita manggavia Palu najadi ngata ra kakavaka todea dako ri sambalikuna” petevaikana.**
Reporter: Firmansyah
