PALU,- BARA SAKUYA Ngganimo topokarjaa kontainer nakava ri kantoro DPRD Palu, netekaika urusara sampe eo hi dopa ria haselena Selasa (24/10/2017) tinti 10.30 wita. Wakele Rambanga nitarima mboto ka Ketua Dekot DRS. Ishak Cae, Balengga komisi C Sophian R.Aswin, Hamsir BE ante Ildijan Djanggola ri ruanga ketua Dekot. Riara potunturakara nerapi ala ra pakavloga vai peti kemas mesua ri ngata Palu.
Ketua Dekot Ishak Cae nangulika anu hai naupumo ni pojaritaka ante Dishub Kota sakuya eo naliu, geira nodekei kontainer nesua ri ngata Palu, tapi nompake jam pesua ante noliu ri jalur ni tontukanmo. Nitambaina muni, Dekot mangala pura anu ni pangaduka tode, ala raelo dala belona, supaya ledo ria tona makarugia riara urusa hie.
Sala saito wakele topo demo Joko riara mpajawab anu nitevaika Ishak nangulika paratura daki ri pemkot eva jam mesua kontainer ante dala ra ose ledo nabelo, batuana nakarugia kami, jam pesua nu oto peti kemas dako ri tinti 24.00 wita sampe 06 padondona, ledo noainggava ante undang-undang No 30 isina hai, tona ri indonesia manggava pakarjaa mabelo dako ri pamarenta, nasosuai ante gaji nadoli muni, dopa vai dala ra ose kontainer aga mamala moliu ri dala Provinsi.
Saena Sangu santanga ja geira nojarita, posintomu ni tunda sampe eo Araba minggu ringayona, apa nadea anggota Dewan da noreses, pade Walikota hau ri ngata ntanina. Tapi dekot nodekei tempo naloga ka kontainer ala mamala mooperasi vai, sampe maria hasele nu posintomu ringayona. Wakele topo demo nerapika muni ka polisi ala mojagai kontainer, apa domo ria tempona hie geira nadota nanggeni ato mpakawal peti kemas.
Reporter: Firmansyah
