PALU,- DAKO HASELE Panggava Komisi C DPRD Palu ri Dapil Kec Palu Selatan ante Tatanga nikakavaka Wakele Ketua Komisi Ridwan H Basatu, Sekertaris Komisi Jovi Alvi Kekung, Sucipto S Rumu, DRS H Alimudin H Bau ante HL Effendy ri kantoro Kelurahan Birobuli Utara Kecamatan Palu Selatan Araba (26/10/2017) tinti 10.30’wita nisintomu ka todea rangata, dako nosani gaji ka topo karja ri kantoro hai aga Rp.250.000 Sambulana ni bayarika kageira.
Sala saito wakele dako ro todea ri libo ngata Sudirman Nompetevaika gaji nitarima topo honr ri kantoro Kelurahan Birut, deana aga Ruatu Lima Pulu Njobu Sambula, ” Yaku no wakeleka roa-roa pura ri kelurahan, mangadu ka komiu wakele todea ala gaji topo karja ri kantoro Kelurahan hie mamala rapompene bara sakide, nambaso harapa kami ala anu hi, najadi rekomondasi ka pamarenta kota le” petevaikana.
Wakele Ketua Komisi C Ridwan H Basatu riara petevaikana ka Kaili Post ri acara hai nangulika, kabijakan pamarenta nikaika gaji topo honorer ri keluran Birobuli.Utara dopa nasesuai ante da riambe standar, ” makuya tano ane ragaji Limatu Njobuna Sambula, dako hasele reses hi, tarutama masala gaji honorer ri Kelurahan Birut, ringayona ra evaluasi pura ngena kantoro-kantoro kelurahan ntanina melalui komisi netekai, ante rapekutan nuapa sabana ” pangulina.
Anu hai nasimbayu muni nipetevaika sala sangu anggota Komisi C, Sucipto S Rumu, ia nangulika nikaika ante gaji topo honor, ” panggavana ane mami topo honor nete daftar ri kantoro kelurahan riumbana ia nokarjaa na kantara deana standar gajina, anempu maria gajira aga Ruatu Lima Pulu Sambula ni bayarika, anu hie rapekutan vai ka pamarenta, apa nakuya gajira ledo nasimbayu ante topo karjaa ri kantoro ntanina” niulina.**
Reporter: Firmansyah
