PALU,- POSINTOMU Polaksanaan Rencana Program Jangka Menengah Daerah (RPJMD) mpae 2016-2021 anggota DPRD ngata ante OPD pamarenta Kamisi (9/11/2017) tinti 11.00 wita, ri ruanga mbaso ato libo posintomu naoge ni tadulakoi anggota Komisi B Moh Rum napane sakide. Riumbana OPD pamerenta , riara anu hie Bappeda madota mpabali RPJMD mpaturusika sura Gubernur Sulteng nomoro 8 Februari 2017 , ante Pemendagri nomoro 86 2017. Amantara hai wakele ntodea naguli ane majadi ra ruba, patuju Walikota Ledo majala ringayona.
Anggota Komisi A Ridwan mpaeva anu hai nangulika, ane Revisi ka RPJMD ra kavia mpu, anu rancana karaka nisusu ka pombangunan ante ntanina domo majala, eva patuju Walikota mpajadika ngata Kaili libo kakava tona dako ri sangatana, anu matantumo mossirumpa ante panggavia anggaran, “ Batuana niulikamo manggavia anggaran, ante nipoikamo ri mpae 2018, tapi RPJM dopa nikarjaa ato da niruba, berimba nompaka simbayuna ngena, anggaran mpatuntumaka RPJMD ato natebale “ nuilina.
Nasimbayu muni anu niulika ka Komisi B Moh Rum nikauka masala hai, nuilina ane RPJM ra ruba, otomatis pura-purana rancana ledo makava ri tujuana, ane aga pombali ri susuna porangkat ngata, ledo nambaso gaga pangaruna, tapi ane nikaika ka urusa mbaso eva rancana pambanguna ante ntanina, mamala majadi urusa mbaso ka polipa pamarenta “ Rakita pra rururu ringayona nikaika anu hie, eva soki-soki, anu ra ruba libona, matantumo anu hai mosirumpa ante ruang netebuka nakodara ngena “ petevaikana.**
Reporter: Firmansyah
