DAKO RI Laporan Badan Pongawas Pomilu (Bawaslu) Sulteng, nikava ovalu
njobu bo limatu Daftar Pomilih Totap (DPT) norapi ri ngata Palu. Vesia niuli
Komisioneris KPU ngata, Iskandar Lembah, Araba (12/9/2018) ri ruangana. Panguli Iskandar, anu hai niposabaka ledo navalid topo data. Eva contona ri sangu kelurahan, nate tulisimo datana. Niposabaka urusa ntanina, ia nelinja ponturo ri kolurahan ntanina. Kauouna ri libo hai nate catat vaimo sangana.
Santanina muni niuli Iskandar, naria kasus ntanina nikaika urusa hai. Eva sanga bo NIK nasimbayu, tapi tonana santanina. Anu hai niposabaka ri
tempona tona hai norekam KTP dopa napaka tuvu. Batuana naria cara pokarjaana nopaka aktif Kartu Tanda Ponduduk. Ane nipaka tuvumo, otomatis Nomoro Induk Koluargana nateruba, jadi domo nasimbayu ante tona ntanina.
Nitambai Iskandar, poroses ponotapan Daftar Pomilih Totap (DPT) ka
KPU, da rakavia nju. Apa ri tempona hie muni, DPT da nosangaka hasele pompaka belo. Pompaka tantu rekap DPT ri Jakarta rakavia ri tanggala 16 September ngena.
Nikaika urusa hai, KPU nju-nju nompaka gali data dako DPT norapi. Ane da rakava vai, KPU mo rekap ante manggavia Pleno vai, sampe domo rakava
sangana Daftar Pomilih Totap na dobol ato norapi. ” Riara urusa hie, KPU
ledo menonto riara mourusi pura, sampe mpu-mpu nagali dako ri urusa daftar pomilih totap norapi, ” pangaku Iskandar.
Ane sakuya deana Daftar Pomilih Totap (DPT) ngata Palu ri tempona
hie, Iskandar nangulika deana ruatu randua pulu randua bo satu tatalu pulu randua njobu.**
Reporter: Firmansyah
