APA Dopa nagana anggaran, Dinas Koperasi dan Usaha Mikro Kecil Menengah (UMKM) Provinsi Sulawesi Tengah damala nobantu 150 UMKM anu nambela bala rii Palu, Sigi ante Donggala.
Maria 2,508 topousaha nakarugia nagero mbara-mbara po usaha ra. “Topousaha hai da 150 dako 2508. Labina damo mantongoraka manau vai anggara. Topousaha nibantu eva dako ri Palu, Sigi bo Donggala. Nibantu mboi limapu deana dako ri kabupaten/kota hai,” panguli Kepala Bidang (Kabid) Pemberdayaan, Pengembangan Usaha Kecil, Dinas Koperasi dan UMKM Provinsi Sulteng, Arifin S. Ahmad, eo Sine (11/3/2019).
Topousaha hai nibantu alima juta, nitransfer langsung hau ri rekening ra. Mekanisme ante syaratna geira ri kabupaten bo kota nangaturuna.
“Bantua hi domo masae ra salurkan. Dopa pa ngena eo potosu ra transfer mo. Vesia mo info niuli Kementrian Koprasi dan UMKM,” tesa Arifin.
Sabana dinas teknis, panguli Arifin, geira ledo nompadekei bantua paralatan maupa modal usaha, apa nateganjela Permendagri tentang pengaturan hibah ante bantuan sosial.**
Reporter: Dedy
