BURONJO RI BIVI BINANGGA PALU RAPAKABELO PURA

  • Whatsapp
banner 728x90

PALU,- EVA NAJADI Pomandangan biasamo nanggita binangga ri palu namovo. Ane maromba vaimo uda, pasti nasesa vaimo toponturo ri bivi nggarona Palu. Sampe eo hi, dopa ria porhatian pamarenta ka masala hai.

Anggota Komisi C DPRD Palu Hamsir. BE mpatevaika masala urusa bivi nggarona ka Kaili Post Kamisi (12/10/2017) nasoro nosintomu ante todea nangulika naria rancana pamarenta ante Dinas Pekerjaan Umum moanggarkan dana ka mompaka belo buronjo bivi binangga Palu maheba.

Rancanana ngena, ri kandatena bivi binangga Palu rakavia dala inspeksi. Rapataka ngena konstruksi tinja ase eva ri polabuhan, batuana buronjo ri bivi karona raganti ante tinja dako ri.ase. Nitambaina muni anu hai ledo aga sakide doi rapakena, pade tempo manggaviana mandate.

Ka eo hie, pamarenta da nompakabelo anu na ponting ruru, eva ri Ujuna, buronjona naria nobolo, gunana ra posuvu uve, tapi ane mavovo uve ri binangga mesua ri bolo nompaka movo ngata. Anu hai rakaviaka katup ala mamala ra stel belekana mompene vai uve binangga ” Manggavia katup ri bivi binangga rakarjai mpae hie, tapi ane mompaka belo pura anu ri bivi binangga, kami da mosilobi ruru ante pamarenta pusat, apa ledo aga sakide dana rapakena” petevaikana.**

Reporter: Firmansyah

Berita terkait