PALU,- NIAKAIKA Ante gaji honorer ri Kelurahan Birobuli Utara, Kecamatan Palu Selatan aga ni bayari Rp250 ribu sambulana, ante hasele dako ri reses Komisi B DPRD Palu sakuya eo naliu, Wali Kota Hidayat nompetevaika Kaili Post ritempona nomparesmika ante mpasusu batu partama nompeangga Masigi ri dala Padang Jakaya, Kelurahan Pengawu, Kecamatan Tatanga Palu eo Minggu (29/10/2017) nangulika dana ka topo honorer ri OPD ngata palu, deana Rp37,5 miliar nibayarik sampaena.
Pandapata Asli Daerah (PAD) Rp130 miliar, dopa anu hai rabagi-bagi vai ka kantoro ntanina, kaupuna damo nelabi nakura kira-kira aga Rp80 miliar, berimba mabelo rapake mombanguka ngata ante dana vesia hai. Nitambaina muni dana topo honorer deana Rp37,5 miliar hai nitomu BLUD,ato nidekeika langsung ka Ruma Sakit, naupu hai nigoliaka vai ka PJU Rp2,7 miliar Sambulana. ‘’Berimba carana ala nompesuvuraka dana aga sakide, nipoto vai dana Padat Karya kaupuna damo Rp19 miliar sampaena nibayarika.
Nakavaopa niulina muni ” Niulikakumo ka balengga nu OPD pura, ala geira topo honor ra paka belo motulisi data-datara. Apa eva nadeantotomo geira, coba komiu molipa-lipa ri kantoro Kalurahan ato ntanina, nadea muni aga nonturo ringayo ato ri bengona, apa ledo nagana gadera ka geira, ledo nitagi geira mohonor, tapi berimba ngatata mamaju ane kita aga moharap dana dako ri puse (DAK), saamantara Panggava Asli Daerah ( PAD ) nidekeika ledo ka anu na parlu, ato ledo nambela podekeikana, ” petevaikana.**
Reporter: Firmansyah
