PALU,- TIM MABES TNI AD ni balenggai Mayjen Joni L Tobing ante anabuana nakava ri tana Kaili manggita mboto hasele pokarjaa Satgas TNI Manunggal Masuk Desa (TMMD) 100 2017 ri gade Masomba ante Uwe Tumbu Kel. Kawatuna, Senin (16/10/2017). Rombongan nitomunaka mboto Wali Kota Hidayat, Dandrem 132 Tadulako Kolonel Inf. Muh Saleh Mustafa, Dandim 1306 Donggala Letkol Kav. I Gede Masa, Kapolresta Palu AKBP. Mujiyanto ri Bandara Mutiara Sis Aljufri Palu.
Rambanga pojabat pamarenta langsung napola hau ri gade Masomba, mangginta mboto anggotana nokarja nanggavia dala ante drainase riara gade hai, dako ri pangantoaka Kaili Post, sakuya nggani Irjenad Randua Betue hai nompetevaika ,mpa cek kabelona pavin ante noukuru luo mbo ndate anu rakajaa.
Haja kakava tim Mabes TNI nijagai mpu ka aparat koamanan, tapi anu hai ledo nompaka munduri todea ri gade nakava mosi ganggo pale ante no Kodak ka pojabat pura nakava hai.
Naria Sakuya nggani rambanga hau nesua ri pogade ntona nompekutanaka berimba karebara pura. Ri tempona hai Mayjen Joni L Tobing nompetevaika ka TNI nokarja mpabantu pamarenta riara nompaka belo gade ala nemo malembo somangatna, ante nemo metaa riara mpadekeika bhakti ka nogara indonesia.
Kira-Kira Sangu jam santanga nangita-nggita riara gade, rambanga napola vai hau ri Uwe Tumbu Kel. Kawatuna, manggita sampe riumbamo mpanggavia dala ri ngata hai.**
Reporter: Firmansyah
