PALU,- TONA ri ngata Petobo notutui posikola SMPN 21 dala HM Suharto Kelurahan Petobo Kecamatan Palu Selatan, Senin (6/11/2017) tinti 9.00’wita. Geira notuntu ala kapala sikola nigantimo, Rustam ala ra uranaka vai ri batena. Anu hai kaupuna nikaviaka posintomu ka pamrenta ante geira notutui posikola, nikakavaka Sekertaris Kota Palu Asri, Camat Palu Selatan Ashar yotomaruwangi, Kasat Pol PP Palu Arif Lamakarate, Kadis Pendidikan Kota Asar Setiadi, Lurah Petobo Masrun.S,os namala nobuka vai anu nitutuira hai.
Dako ri pangantoaka Kaili Pos ri libo nu kajadia, kira-kira tinti 10.15 wita, wartawan nakava ri SDN 12 nitagi nangala gambara ante mangelo kareba. Geira nangulika ” Wartawan nemo makava tumai, aginamo manjili pura, ledo mamala mangala gambara ri sie hi, ledo nakuya mo kodak, tapi kamailekana kapala sikolah nigantimo rauranaka vai tumai ” nanggita urusa domo nabelo, ante molevaka belekana ngena mosidenggu, kaupuna wartawan pura nalai ri kantoro kelurahan Petobo nontonggoraka kareba ringayona.
Kira-kira tinti 13.00’wita nikavia posintomu geira tope buntu posikola ante pamarenta, nijagai polisi daki ri Polsek Palu Selatan ante Satpol PP. Dako ri posintomu nikava patujura ala kapala sikolah nigantimo Rustam, rauranaka vai ri SDN 21, patujura pura hai nitarima pamarent, tapi ra timba vai ruru pade radekei haselena. Lurah Petobo nikakavaka Kaili Pos nangulika, naupuna nipojaritaka pura urusa hai, kaupuna geira mboto nobuka posikola nibuntura, ane urusa ra potingguli kavai kapala.sikola nggaulu, panguli Kadis Pondidikan da timba vai ruru, niposabaka anu hai nasosuamo ante mekanisme dako ri pamarenta ” Geira pura mpasegel posikola hai dopa ranga nisanira berimba urusa sampe kpala sikola nilinja, Alhamdulilah geira mboto nobuka anu nitutuira, jadi maile ngana mamala mosikola vai ” petevaikana.
Samantara hai, Kapala Dinas Pondidikan Kota Palu Ashar Setiadi nangulika ri talipo pale 0811456xxx ka Kaili Pos nangulika nikaviamo posintomu pangane ante kami dako ri pamarenta, kaupuna geira namala nikeni nokarja sama, ” Niala pura kamimo.pangadua geira, ane urusa kapala sikola nggaulu rauranaka vai, da ra portimbangkan vai ruru, nomoro sangu ngana mamala vai mosikola ” pangulina.
Reporter: Firmansyah
