Reporter: Firmansyah
DAKO ri posintomu badan anggaran (Banggar) DPRD Palu ante pamarenta ngata, Salasa (24/72018). Nikaika ka anggaran pondapata bo balanja daerah (APBD) mpae anggara 2019, natebonto niposabaka dopa naria roncana karja anggaran (RKA) dako ri Bappeda. Kaupuna rapat hai ra kavia vai ri eo Jumaa, tanggala 26 Juli ri ngayona.
Nobalenggai posintomu hai, ketua DPRD Palu, Ishak Cae nadea nanggava pojaritai dako anggota banggar ntanina. Eva Danawira Asri, pangulina riara posintomu ledo aga ra wakeleka Asisten III. Tapi nakurana balengga nu TAPD pemkot makava (Sekot). Tujuna ala mamala mopasinjori tina nu anggaran pondatan asli ngata sampe maupu. Nggauluna Sekot nakava nju. Santanina muni tujuna ala riara urusa hai maria kaputusana. Ledo aga molanto bayangi. Ane asisten rapekutana berimba hasele koputusa, aga ra ulina damo rapekutana vai ruru ante pimpinanra.
Anu hai nasimbayu muni niulika anggota banggar Hamsir. Panggavana ala posintomu hai rakakavaka mboto ka Sekot. Ala mamala rakava kosopakatan ante pemkot riara modekeika usulan anggaran sampe mapumpu urusana. ” Dekeimo usulan tumai, rasotujui pura. Tapi nemo nate ruba vaimo ngena. Ala pimpinan mamala motevaika berimba kabijaka umum anggaran apa anu hie nipanto dako ri RKA, ” pangulina.
Anggota wakele ntodea ntanina i Ildijan Djanggola nangulika muni ala ri posintomu hai, rakakavaka kantoro natekai dako ri pemkot. Ala namala raepe berimba target panggava APBD ri mpae 2019 ngena. Ledo aga mosani sakuya ante riumba pobalanjara. ” Nakurana bagia kounga makava ri pisintomu hie. Ala rasani pura ngena. Kutevaika ala porapat hie rabontomo ruru, sampe maupu rakavia pura RKA, ” perapina.
Anu hai nasimbayu muni niuli anggota banggar i Armin, panggavana ane posintomu ledo ra bonto, nasimbayu muni urusa hie notingguli hau ribengona vai. Ane mariamo RKA mamala rasani berimba usulanta pura nateala ato ledo. ” Jadi panggavaku, kana nabelo ane pisintomu hie rapetaa. Motonggoraja kaupu rakavia RKA pade rapamula vai, ” petevaikana.
Samantara hai, Asiten III sekot Muhlis nangulika naupumo no hubungi BAPPEDA, nikaika ka urusa rancana karjaa anggaran. Tapi pangulira damo eo Kamisi pade maupu rakaviara. Ia mboto mopaka tantu RKA hai mariamo ri pale anggota banggar ri eo kamisi ngena.
Dako ri petevaika anggota banggar ntanina ri posintomu hai, ala porapat ra pamula ri eo juma tongoeo, balengga nu rapat nantarima perapira. Saena pokrarjaa dako ri banggar mboto. Nompamula dako ri tanggala 24 sampe 30 Juli. Ri tanggala 30 bula nasimbayu pade mariamo hasele kosopakanra pura.**
