ASUPAYA Taman Vatu Lemo mpu-mpu ra fungsika majadi alun-alun bo taman kota, maria 179 geira niulika pedagang kaki lima (PKL) ra aturu mpanjili ponturora.
“Sabanarna, niparenta mo wali kota tanggala 2 Juni PKL ri Vatu Lemo supaya motutuimo pogade ra. Geira ra linja ri hutan kota Kaombona,” panguli Kasat Pol PP Palu, Nathan Pagasongan, eo Sine (10/6/2019).
Tapi, nitesa Nathan, santanga PKL hai nolinjamo ri gade Lentora ri jalan Pue Bongo.
“Tanggala 2 Juni riavi, nososialisasi kami mo ka PKL ri Vatu Lemo supaya ane mamala masuka mo molinja,” pangulina.
Ane PKL ri Pue Bongo, tesana vai, bara masae geira hamai bara ledo, damo tupu nu tana nipake ra mopakatantuka. Apa lokasi hai ledo anu nu pamarenta.
“Masae atau ledo geira hamai, damo tupu nu tana. Ane tupu nu tana da modekei geira hamai, na sikurumo. Ane domo, ledo ba berimba pemkot,” niulina.
Tanggalaa 10 Juni nompamulamo satpol PP nompakatortib PKL ri Vatu Lemo. Naupu lingu mbaso, wali kota nompadekei kompensasi ka topo gade mo balu-balu ri alun-alun kota. Batuana mompepevoke mpanjili katuvua ekonomi ntodea.
“Apa nevoke mo sakide ekonomi nu Palu, jadi geira masuka mo ra linja,” tesana.
Relokasi ri hutan Kaombona, da aturu pakabelo ante niukuru kaplingan lokasi ka PKL.**
Reporter: Firmansyah Lawawi
