Reporter: firmansyah lawawi
PEUMBA Potasere ‘posogo’ nu PT Global Daya Manunggal (DGM), kontraktor nokaraja jambata IV anu naombomo ri tempo lingu mbaso 28 September mpae naliu, niakui Ikbal Andi Magga SH ka wartawan.
Niposinggavaka ri kantoro DPRD Palu (1/7/2019), ia nangaku ane polemic posogo nu PT GDM na porna mo watu ia najadi Ketua Dekot Palu.
Naporna ia nitavari doi Rp2 miliar. “Nakana I Herman dako ri DGN notavari ka yaku doi deana randua miliar. Patujuna supaya madota yaku mompalolosika pombayari inda jambata IV. Tapi ledo nadota yaku. Nuapa dasarna mombayari, nariamo rara RAB, labina ledo ria bunturuana bo rabayari,” tesana.
Mantan ketua DPRD anu najadimo Anggota Komisi A hai notesa ane nuapa nituntuka DGM, supaya rabayari inda pombangutaka jambata IV, apa naria pompene ali nu rangka baja jambata.
“Alasana naria pompene atau eskalasi rangka baja nasosuai RAB. Samantara ledo ria kaputusa Menteri Keuangan natekai pompene ali nu mbara-mbara watu hai. Apa landasa atau barometer pompene ali nu mbara-mbara, maria kaputusa atau SK Menkeu,” pangulina.
Saharusnya, panguli Eky, danariapa upaya hukum rakavia mompagugat DGM apa tuntuta ra ri pongadila mombayari inda jambatan IV. Putusa BANI hai ledo nosipa yudisial atau nepou.
“Da maria upaya hokum mompaguga porusahaan hai. Apa dopa na final. Maria pompatinjau mpanjili kasusna. Nuapa ntoto paraluna kana rabayari jambata. Dopape jambata hai naombo mo,” pangulina.
Samantara, ri mpae 2006, jembatan IV nalunas mo nibayari. Eva nuapa niuli rara RAB. Deana Rp57 miliar. ‘’Panguli mantan Kadis PU Palu, naupu nipekutanaku, kontrak Pemkot ante DGM saratus parase naupu mo nibayari,” tesana.
Nojawab tesa sala sangu anggota DPRD, naria isu doi pombayari inda jambata IV hai, naria nitarima legislator Dekot, Eky nanguli ledo nisanina.
“Ledo nisaniku le. Ane ruru naporna yaku nitavari. Tapi notolakku. Geira nerapi mombayari jambata IV. Maria ngena ra bagi fee na, maaf saja,” niulina.**
