Reporter: Firmansyah Lawawi
KAIUNGGUA Yahdi Basma, anu nilapor kasus nitasere nompatolele kareba dava (hoax) nanguli tuamata Gubernur Longki Djanggola, nasampe mo ri Dewan Adat Kota Palu.
Katua Dewan Adat Kota Palu, Rum Parampasi nanguli Yahdi Basma ra givu apa kaingguana nompakaea Gubernur Longki Djanggola, tomaoge ri ngata Sulteng.
“Gubernur Longki Tomaoge atau tona nitande belo todea ri Sulteng. Apalagi, ia makumpu Raja Palu,” pangulina ri tempo podemo ri ngayo Mapolda Sulteng, eo Juma (5/7/2019).
Po givu ka Yahdi Basma marupaka potesa nu ada nosangaka tonda talusi. Poroses tonda talusi, Katua 1 Dewan Adat Kota Palu, Timuddin Bouwo nanguli Yahdi Basma ra pokio nu suro ada, majadi tosala. Pade rakavia potangara Nuada.
“Potangara nu ada rakavia ri Bantaya ponturo to sala,” pangulina. Monturo ngena ri potangara nu ada hi, Yahdi Basma to sala, ante tuamata Longki, to rugi.
Hasele potangara nu ada, ledo mamala ra eva, panguli nggapuri banding. Givu radekei ka Yahdi Basma, panguli Timuddin, givu salambivi.
Tapi, ane mambaso ntoto sala na, mamala muni ra givu salababa. “Givu salababa hi, batuana rapopalai dako ri ngata Palu,” tesana.**
