Tatalu pulu bo ampa, dako pura-purana tatalu pulu bo alima deana wakele todea ngata Palu 2014-2019, nipetoto Inspektorat Palu. Nikaika dana Reses triwulan I, II, ante III. Vesia niulika kapala Inspektorat Palu, Didi Bakran.
“Dako panggava Badan Pemeriksa Keuangan (BPK) nikaika dana Reses pangande bo panginu tatalu pulu bo ampa anggota DPRD Palu 2014-2019. Kami nitudu nomparesa ka urusa hai, ” panguli kapala Inpektorat Palu, i Didi Bakran, ri tempona nasiro posintomu natetutui ri ruanga gabungan kantoro DPRD Palu, Senin (7/10/2019).
Deana dana Reses nitarima talu pulu bo ampa wakele todea DPRD Palu, ri triwulan partama, randua, bo tatalu, nitevaika i Didi Bakran, Rp.1,8 milyar.
“Anu hai da namala noenju. Apa da manggita buktina. Eva foto, dokumen, ante absen. Ane magana pura, insya allah ledo ria rakava, ” niulina.
Pangulina, dana Reses triwulan tatalu, nacairmo ka talu pulu bo ampa anggota DPRD Palu, ri tanggala 28 September 2018. Dopa nakajida lingu, balumba mbaso, ante tana noenju.
“Dana Reses triwulan tatalu, nialaramo ri tanggala 28 September 2019. Pas nggoviana naliungomo. Pangulira, dana hai nailikamo ka logisik. Pade nibagira ka todea pongungsi. Naria muni doina nalipo naiala Tsunami, ” pangakura.
Tapi niuli i kapala Inspektorat, geira raperapika bukti natetulisi, nikaika bantuan nideikara ka pongungsi ri ngata Palu. Nompake dana Reses.
“Kami merapi bukti potulisina. Riumba lokasi podekei bantua, isema pura nidekeika. Ane geira nalipo banuara nambela boncana, raperapi sura koterangan dako kelurahan. Nakana mpu domo ria banuara. Damo kami modekeina ka BPK. Ratarima ato ledo, hai urusa BPK, ” nitevaikana.
Nitambaina, ri tempo mamosu hie, geira manau ri lapanga. Moverivikasi. ” Insya allah rapaka upu ri mpae hie. Damo motonggoraka dokumen potambaina. Eva lokasi Reses. Kami morambanga manau ante anggota DPRD Palu, mompekutana kelurahan bo todea. Nakana mpu naria Reses nikavia, ” pangulina.
Riara proses nomparesa, Inspektorat muni morambanga ante tim ponanggulangan korugian koungangan nogara ka daerah.
“Pamulana kami ntani manau. Ane mariamo sura tomuan. Ante geira ledo madota mouranaka dana Reses. Pade tim manau, ” nitesa i Didi Bakran.
Ane mami 34 wakele todea DPRD Palu ledo namala nompakitaka sura bukti dana Reses. Inspektorat merapka ala dana hai, rapotingguli pura vai ka kas daerah.
Pangakuna, talu pulu bo alima deana wakili todea DPRD Palu, aga saitu ledo nangala dana Reses triwulan partama, randua, ante tatalu. “i Erfandi Suyuti ledo nangala dana Reses triwulan partama, randua, bo katatalukana,” pangakuna.***
Reporter: Firmansyah Lawawi
