Dako ri hasele ponilitian ahli bo Kementerian, nitauraka ri peta Zona Rawan Boncana (ZRB) tana ri ngata Palu madea mambela tana noenju. Vesia nitevaika Kapala Dinas Penataan Ruang bo Portanahan Palu, i Mohamad Rizal ri haja konsultasi II revisi RTRW, eo Araba (16/10/2019) ri Hotel Best Western Coco.
“Dako ri ponilitian ahli bo Kementerian, nitauraka ri peta ZRB, nadea tana ri ngata Palu mambela tana noenju,” pangakuna.
Panggavana, urusa hai kana ratevaika ka todea riara ngata. Niposabaka ri tempona nalingu mbaso naliu, todea nanggisani tana noenju aga nakajadia ri ngata Petobo ante Balaroa.
“Anu hie kana ratevaika ka todea. Kajadia tana noenju riavi, Kelurahan Petobo ante Balaroa nambela Likuefaksi. Niposabaka tanana nalanga. Nipisabakamo hai, najadi tana noenju,” pangulina.
Ri sakuya ngata ri Palu, tempona lingu mbaso naliu, nesuvu uve ante tampo. Niuli i Mohamad Rizal, haimo hai tanda tana noenju.
Niulina muni, todea aga nanggisani sangu patahan mbaso ri ngata Palu. Sangana sesar Palu koro. Tapi muni da nariapa patahan kodi ntanina. Eva naria ri dala Sukarno-Hatta. “Anu hie muni kana ratevaika ka todea. Damo railuka ngena ri RDTR,” niulina.
Niposabakamo hai, naupu lingu mbaso naliu, riara mombangu ri libo tertentu ngata Palu, rapevile bo rateliti ntani ruru tanana. Eva mombangu banua nalanga. Ra kaji vai ruru. Mamala rakavia banguna madea tingkatna ato ledo.
Riara peta Zona Rawan Boncana (ZRB) nisuvurakamo. Naria sertifikat nikaika Standar Nasional Indonesia (SNI) 1726. Berimba cara manggavia banguna nantaha lingu. Anu hai muni rapajadika patokan pamarenta riara mosuvuraka izin mombangu ri ngata Palu.
“Sampe eo hie, dopa ria nikava banua naama ka tana noenju. Kajapa ahli dako ri Jepang, napusi balenggara nompekirikana, ” nitevaikana. ***
Reporter: Firmansyah Lawawi
