Ngata Palu,- PNS, TNI, ante Polri, ledo namala motandatangangi sura meduku calon mboto ato non Partai riara Pilwalkot 2020. Vesia nitevaika Devisi data KPU Palu, Idrus tempona haja sosialisasi ri dala Cempedak , Kelurahan Boyaoge, Kecamatan Tatanga, ngata Palu, Senin (25/11/2019).
“Bukti riara neduku hai, eva foto copy KTP ante sura pornyataan dako todea. Anu hie napaka sangu pura riara sangu lampiran. Kami merapika ala PNS, TNI, bo Polri, manetral riara urusa hie, ” pangulina.
Petevai porsyaratan sura calon ledo niduku partai ri Pilwlkot, nompamula ri tanggala 11 Desember 2019, sampe tanggala 5 Maret 2020. Ante deana suara 21.396 KTP.
Kasaena tempo mokampanye ri Pilwlkot 2020 niuli i Idrus, aga randua mbula. Anu hai nantoraka ane masae ntoto hajana, ledo maefektif. Nitambai vai belekana aga majadi posisala bo posibaga todea.
Tompat Pomungutan Suara (TPS) nateenju deana. Ri Pomilu 2019 sanjobu labi TPS. Tapi ri pompelisi Walikota mpae 2020, deana aga 699 TPS.
Natambaina muni, mpae 2020 ngena, ri pompelisi Cagub bo Pilwalkot, eo potosuna morambanga pura. Ante kotak suara raposuaraka sura deana randua.
Deana doi nipake ri Pilwalkot 2020, Rp. 41,5 milyar. Mpae 2019 rapake Rp.1,6 milyar. Ri mpae 2020 Rp.39,9 milyar. Nompake Anggaran Pendapatan Belanja Daerah (APBD).
Komisi Pemilihan Umum (KPU) Palu muni pangulina, manggavia seleksi ponyelenggara Adhoc. PPK ri tanggala 1 Januari 2020, PPS tanggala 23 Februari 2020. Kaupu pokarjara ri tanggala 25 November 2020. Ane KPPS, raala sambulapa dako ri haja potosi ri tanggala 23 September 2020.
Santanina muni hai, geira muni mangala relawan demokrasi. Kasaena pokarjara ampa mbula. Majadika lolo nutavala nu KPU Palu, riara motevaika katodea ala mompelisi ri Pilwalkot 2020.
“Ante nambaso rara kami nangaku, target deana kambela nu data ri Pemilu 2019 naliu, rapakabelo ri Pilwalkot 2020. Anu hai niposabaka lingu mbaso ri tanggala 28 September 2018 naliu, ” pangakuna.
Reporter: Firmansyah Lawawi
