Maile (Salasa, 13/4/2021) puasa rimpae 2021 mompamula mo. Eva biasana, ane namosu puasa ali nugade nompamula muni mo nompene.
Eva ali dagi nu manu ri gade Masomba nompene maria aono njobu sampe sapunjobu na.
Topobalu ri Masomba, Fira (43) notesa ane ruru ali dagi numanu nomore ri sapuvalu sampe ruapunjobuna. Tapi mariamo saminggu hi nompene alina najadi ruapulu aono njobu sa kilo.
“Mamosu bula mpuasa, ali nua ayam potong ante ras nompene mo. Ayam potong alina ruapulu bo aono sa kilo. Alina muni hi natorgantung dako ri porusahaan. Ali aga sapuvalu sampe ruapunjobuna ruru, eo hi ruapulu bo aonomo. Ane ayam ras ruru aga limapu njobu, hi mami alima pu bo alima mo sa mba,” pangulina ri pobaluna ri gade Masomba (Sine, 12/4/2021).
Nitesa na muni ane nadea topangelo dagi nu manu ri bula Ramadhan. Ri ala saeo maria sanjobu mba na manu nipobaluna.
Ane eo ntanina, aga satu sampe ruatu manu nisambale na.
“Ane puasa, nadea topangelo manu le. Nompene, apa nompene muni alina dako topepagoli. Bo mompene nju mo ali eo-eo ya. Eva eo hi alina aono pu bo alima, maile mompene vai aono pu bo aono. Vesi nju ngena sampe eo ngga buka,”. ***
Reportase/translate: Windy Kartika Zahra/Iksan Madjido
