LEDO Ngena aga banua nalipo nambela bomba talu nte tana nalodo, ra relokasi bo manggava huntap, tapi banua nagero ri zona merah manggava muni.
“Eva ri Buluri, maria 53 KK nesua ri zona merah, atau ri lokasi nitagi mombangu banua ponturo. Geira hi manggava huntap muni ngena,” panguli Kapala Bidang (Kabid) Kedaruratan dan Logistik BPPD kota Palu, Mohamad Bambang Sabarsyah, eo Sine (18/3/2019).
Niulina, ane todea lemadota molinja hau ri huntap anu nitotapkan mo pamarenta, eva ri Tondo bo ri Duyu, tapi geira merapi rabangu ka huntap ri tana ra mboto, pamarenta mompaturusi muni dota ra hai. Asal tana ra hai ledo ri zona merah.
Vesia muni geira ri Petobo bo ri Balaroa, ane madota mombangu mboto ri tana ra, mamala muni. Data ra hi nesua mo ri Bappeda.
“Tapi anu hi da nitesa bayangi ngena. Da na tejo. Apa realisasina dama saepa. Tapi ane panguli nu undang-undang, banua gero ri zona merah, kana ra relokasi muni,” tesana.
Sampe eo pangane hi, da nikaraja nju pompataka pato zona merah ri Palu. BPBD aga no back up, batuana, agar i purina.**
Reporter: Firmansyah Lawawi
