Mau kita nambasomo pangka bo mabelomo katuvuata ri dunia, nemo ntoto masombo ante guru. Vesia nitevaika i Wakele Walokta Palu, Sigit Punomo Said, ri haja pobasaka kapala UPT pondidikan wilayah 1 Palu Utara, Tavaili, ri sala sangu lestoran ri ngata Palu, Salasa (1/10/2019).
“Madota malanga SDM, kuncinya ri pondidikan. Nipisabakamo hai, nemo kita masimbo ante guru. Mau kita malangamo pangkata bo mabelomo katuvuata,” pangulina.
Ritempnamo hie, nadea guru nipaka lembo ka paratura. “Ri tempona hie, domo namala guru mokinggo sakide. Kana ra pangaduka ka polisi. Dopa vai kajadia dako-dakopa hie. Naraia totua nu ngana hau nokarapu guru,” niulina.
Karona mboto, namboso mpu rarana mompaka nyama pondidikan riara ngata Palu. Kaupuna anu hai namala nompajadika generasi muda makua bo mabelo ri kaulunan ngena.
Carana mompakasadia nuapa pura naparlu ri posikola. Pondidikan gunana nompaka pande, bo juara ngana. “Ampa pulu poresn anggaran nipakasadiata ka pondidikan . Nidagina standar nasional. Ala kita mompaka nyama topo sikola ante guru,” pangakuna.
Nowakeleka pamarenta ngata Palu, Pasha notevaika songgo mpoasina ka kapala UPT pondidikan Palu Utara bo Tavaili, Agusalim, ruimba ri sapulu randua mpaemo ia nokarjaa ka todea.
“Karoana haja hie, najadi tanda berimba kapala UPT, Agusalim nipikono ntona. Ia sala saito naheba, nibasaka ante doa dako insan pondidikan ri ngata Palu,” petevaikana.
Haja hai muni nikakavaka, Sekdakot Palu, i Asri ante guru bo kapala sikola Kocamatan Palu Utara Tavaili.
Reporter: Firmansyah Lawawi
