Ri haja posintomu bo pangala peulu todea wakele DPRD Palu, i Sucipto S Rumu, Senin bongina (2/12/2019) ri Nunu, randua program rakavia mpae 2020, ri ngata hai.
Peulu hai pamulana nitevaika i Ilham. Pangulina, ri keke mbaso dala Sungai Sadan, domo nandala. Apa nadea tana, rumpu, ante bone nesua riarana. Mau aga uda nanggarente, uve dako ri keke hai, nesuvumo ri dala. Ledo aga hai, movona sampe nesua ribanua ntonamo.
I Lam muni nerapika ala pamarenta momparateka kola pomei Nosarara ri bivi binangga Palu. Niulina, uve nesua ri libo pemei, ledo nagali.
Niposabaka keke nipotedeaka dako riavu bo topo usaha ntanina, noili hau ri kola nipajadika destinasi wisata ri ngata Palu.
Dopa vai ri libo kola bo dala ri bivi karona domo naria poindona. Kaupuna aga rapajadika libo topositenge ante manggavia doyo ntanina.
“Nggauluna, lampu tonaga Surya ri bivi karona bo kola pemei hai navaya. Naupu lingu mbaso, domo ria nipangangga tonamo akina. Kaupuna ri libo hai nalandamo, ” pangakuna.
Kapala Dinas PU Palu, i Iskandar Arsyad nangulika, naria anggaran rapokae keke domo nandala ri kantorora. Nampake cara swakelola. Ri mpae 2020, pamarenta ngata Palu manggavia program mompaka belo keke uve kawasan. Ri libo kasolonue Palu, deana doi rasuvuraka Rp.15 milyar.
Nikaika urusa uve naruto nesua ri kola pemei Nosarara, i Iskandar nangaku kana rapekirika pura. Carana uve dako ri keke, domo rasuaraka ri libo hai. Damo raala uve dako ri mata uve ntanina ri Nunu. “Ane lampu ri bivi karona bi kola pemei, kana rausahaka mavaya ngena, ” petevaikana.
Anu hai nasimbayu muni niuilika wakele dako kantoro porumahan bo pomukiman Palu, Mohamad Nur Larisa. Ri mpae 2020, pamarenta ngata mosuvuraka program mompaka vaya poinda ka todea. Rancanana mompake LED. Deana 18.000 titik rapataka kapoindo vesia hai. Nesuamunimo dala ri bivi karona ante kola pemei ri Nunu.
Wakele todea DPRD Palu, i Sucipto S Rumu notevaika batua nu reses hai, nosonggo pura nuapa perapi tona ra ngata. Tapi ledo pura namala rapaka jadi. Apa ledo nagana anggaran. Kaupu nu lingu mbaso, aga urusa nambelo ntoto ka todea ra utamakan.
“Riara reses bongina hie, naria randua poin nikava. Eva mompaka ndala keke, mompaka belo uve kola, ante mompaka vaya poindo ri bivi karona, ” niulina.
Nitambaina muni, dala ri Nunu, naupu puramo nipaka belo. Tapi nariapa muni dopa niaspal. Ri mpae ngayona, kana rarapartiika pura. ***
Reporter: Firmansyah Lawawi
