Palu,- Laja (38) Topopempe dako ri Salena, Kelurahan Buluri, Kecamatan Ulujadi, Kota Palu. Minggu (12/01/2020) nipeinta novia bago nantunu taono ri mata nuapu anu nipakasadiana, Bago hie nasaemo nipoviana.
Kapandena Nopempe Taono nipeguruna ante tomana anu nasaemo kamatena. Laja le nompake baju ia nanguntiaka tona nakava ri tampana nopempe ase.
Laja nanguli ia namala nopempe alima taono riara saeyo, Sementara ane motambai bajana (kakuana) taono sampe ruampulu riara saeyo.
“ Ane novia taono dako ri ase, namala nikarjaku alima taono riara saeyo, ane aga notambai bajana ala makua biasana sampe ruapulu riarana saeyo apa le nasusa gaga.”
“Ane tempona hie dopa novia taono apa da nompakakua bajana ruru, Pade da
novia kayu ntaono ante valombona apa nadea muni tona nekipovia ante yaku”. Panguli I Laja
Nipekutan sakuya ali nu taono nipoviana, ia nanguli tergantung nuapa ni tuduka ia novia ante ka susana novia itu nopengaruhi alina.
“Ane alina tergantung nuapa nitudu rapovia, ane tona aga mompaka kua baja taono nidekeiku sampulu alima samata taono, ia ane novia taono nasuli sadike apa dako ri ase ntiongu, nidekeiku satu njobu samata taon. Ane novia kayu ntaono ante volombona satu njobu muni jadi ruatu jobu saungu set langsu najadimo hai.” tesana
Niulina muni supaya taono mantaha naria carana motambai bajana ala rapake mantaha le nasalisa makoto.
“Nompaka kua bajana ratunu ruru taono, Ane maleimo pade radika ri uve itumo sabana taono nipoviaku nakua pura bajana, Mau nasaro nipake notovo kayu nantaha ia. “
Ledo aga tona ri Salena nekipovia taono ante ia, naria muni tona dako ri ngata ntanina, I Jeki naria saito topekipovia taono nanguli, baja nu taono nipovia I Laja nakua, pade alina muni le nasuli gaga.
“ Nagaya taono nipovia I Laja, nakua bajana pade nasempo alina, itumo yaku ane nekipovia taono ri tampa I Laja. Ane Taono nipobalu ri Potomu le nakua bajana”. Tesa I Jeki
“Anu nipobalu ripotomu dako sanggani, ruanggani nipake notovo kayu nageromo, apa le nakua najana. Ane risii ni tunu taono pade nidika ri Uve itumo sabana nompaka kua.” Tambai I Jeki. ***
Reporter: Arman Seli
