Rancanana, anggota DPRD Palu hau manggita dala naombo ri Monginsidi, Kelurahan Lolu Selatan ngata Palu. Salah saito wakele todea DPRD Palu, najadi muni wakele Komisi C, i Nanang ka Kaili Post Jumaa (11/10/2019) di ruangana, nangaku mpu-mpu momparatika dala naombo hai.
Pangulina, ane ledo rapakabelo, dala hai mompaka cilaka tona moliu. Apa dala hai muni sala sangu naroa niose todea ri ngata Palu. Niposabakamo hai, rancanana eo hie, geira manggavia rapat partamara. Sala sangu rajaritai, urusa mangelo cara berimba ala dala Monginsidi mabelo vai.
“ami morapat eo hie. Damo kutevaika pura ka roa-roa ngena. Berimba carana motevaikana ka dinas natekai. Kami muni manau manggita dala hai, ” pangakuna.
Nggauluna, Anleg dako partai PKB hai napernamo notevaikana ka dinas natekai. Nipisabaka ri tempona muni hai dopa natekavia Alat Kolongkapan Dewan (AKD) ia dopa namala nojarita nadea gaga.
“Naria posijarita kami ante intansi natekai Provinsi Sulteng. Pangulira, rimpae hie muni rapaka belora dala hai, ” niulina.
Lurah Lolu Selatan, i Sahdin ni pekutanaka ri talipo palena nangulika, petevai dako balai jalan ni pekutanana sakuta eo naliu, nangaku mompaka belo dala naombo hai.
“Naupumo nitalipoku balai dala ri sakuya eo naliu. Pangulira geira kana mompaka belo dala Monginsidi, ” pangulina.
Notuntumaka petevai dako balai dala, i Sahdin nangulika, pamulana riambe dala rapataka box cover. Gunana ala domo maluo kaombona.
“Box cover rapake ri dala Monginsidi, deana sapulu ovalu. Dako netepatakamo sapulu. Ukurana 1,5×2,5. Ante ntamo sangu box cafer alima ton, ” petevaikana.
Reporter: Firmansyah Lawawi
