Dekot Mobantu Forum Debitur Pasigala

Reporter: Firmansyah Lawawi

KATUA DPRD Palu, Ishak Cae
nangulika wakele todea madota morambanga ante forum debitur Pasigala hau
mosintomu ka Wakele Presiden RI, Jusuf Kalla riara merapika pamarenta riara
mobayari inda todea ri Bank. Anu hie nitevaikana nasoro posintomu rdp ante suro
kouangan Sulteng, Salasa (15/1/2019)

“Riara urusa hie,
sasio fraksi naria ri DPRD Palu neduku forum debitur Pasigala. Santanina muni
hai, kami muni madota hau morambanga modintomu ante wakele Presiden, ”
pangakuna.

Nikaika sura rekomondasi
dako ri Walikota ka wakele Presiden, najadi sala sangu dala riara porjuangan
forum debitur Pasigala, i Ishak Cae notevaika ri nggauluna anu hai napernamo
nijariaikana ante Walikota.

“Anu hie napernamo
nijaritaiku ante Walikota. Riumba niulakau naria petevai dako forum debitur
Pasigal, nerapi rekomondasi ka Walikota ala modekei sura ante wakele Presiden,
” niulina.

Tapi pangulina, ia muni
dopa nabia nesuvuraka sura rekomondasi ane dopa manggavia posintomu ante suro
koungan ri Sulteng. Riara mompaha berimba dala riara urusa hie.

“Naupumo nosintomu
hie, kami mosuvuraka sura rekomondasi dako pamarenta ngata ria neduku forum.
Damo geira vai hau mangulikana ka Walikota. Apa nibukakumo dala kageira
baraipia hai. Naria muni tanda dako Walikota mosuvuraka muni tekomondasina,
” petevai i Ishak Cae.

Nipekutanaka mamala inda
pura hai rabayari pamarenta, i Ishak Cae nangulika riara porjuangan, mambaso
harapa padagi.

“Riara urusa hie,
kita pura ledo mamala makodi harapa riara mobantu todea riara ngata. Rapaka dea
sabara, ane madota padagi,” notutui jaritana.**