Riara nompatoraka lingu mbaso ri tanggala 28 September naliu, Walikota Palu, i Hidayat ante pagawena, hau nosiara bo nodekeika bunga ri bavo dayo ntodea nambelaka tana noenju (Likuefaksi) ri ngata Petobo, Jumaa (27/9/2019).
” Nosiara bo nodekei bunga ri bavo dayo eo hie, najadika rasa bela sungkawa kami pura ka sampe suvu sarara kami namate nambela lingu, balumba mbaso, bo tana noenju ri tanggala 28 September naliu. Raperapika ka tupu, ala geira pura mabelo ri ahera. Sarara nibolakara ala mosabara pura, ” niulina.
Naupu lingu mbaso ri tanggala 28 September naliu, i Walokta Palu nerapika ala todea riara ngata Palu, mompaka sangu rara riara mombangu vai ngata.
Niperapikana ka todea, ala motedeaka pura posisala naliu. Riara mompaka belo vai ngata Palu ri ngayona.
” Ane ledo kita morambanga pura, natantumo ngata Palu ledo namala mabelo vai ri kauluna, ” pangulina.
Magana sampae kajadia lingu mbaso, i Hidayat muni notevaika ala todea ri ngata Palu, modoaka geira najadi korban lingu, Tsunami, bo Likuefaksi.
Rancanana, ri kauluna ngena, libo dayo ntodea hie, rakaviaka monumen riara mompatoraka geira namate nambela tana noenju Kolurahan Petobo.
” Insya allah ri kauluna ngena rakaviata monumen. Ala mompatoraka geira namate nambela tana noenju ri Petobo. Dala mesua tumai muni rapaka belo. Tapi ri tempona hie, kita mourusi ntani ruru ka geira ponyintas ri ngata Palu, ” pangakuna.
Haja hai nikakavaka muni Wakele Walikota Palu, i Sigit Purnomo Said, Sekkot Palu, i Asri, kapala kantoro ngata Palu ante pagawena, bo Forkopimda Palu.
Reporter: Firmansyah Lawawi
