Palu, -Todea ri Salena nikanala ante Adana, nadea mpu ada ri Ngata hie (Topoada). Eva niulika Notalili Vunja, ada nipovia mompakagana vati nungana mombine nikeso, tempona hi nipovia bago ri Salena, Kelurahan Buluri, Kota Palu.Senin (13/01/2020)
Notalili Vunja nipovia papitu ngganina, ane ri Salena natopa niuli nolonggo nta,u kamonji ante palapa nusambulu anu nipakasadiaka. Ane niulika toniasa (ngana mombine) notalili vunja ala mompakagana sipa ada nokeso. Totua Ada Salena, Likesando Kukadompu niposinggava, nanguli ada nokeso nabiasamo nipoviana dako ri totua nggauluna.
“Nasaemo kami novia ada vesi dako ritotua nggaluna, ada le nama raboli. Ane madota katuvua mabelo ante ngana manoto nemo ra kalingasi ada, kabiasa ntotua.” Pangulina
Ia muni nanguli ane ada ngana langgai ante mombine nosisala vesia muni ante ramba-rambana.
“Ane Nokeso nipoviaka ngana mombine, itumo sabana kana notalili vunja ala mambela adana, nemo sampe masala vati. Ane ngana langgai le nikeso tapi ni Bau.
Tujua nokeso ala riara katuvuna ia radekei ntupu ka ko’o nuvuku ante manoto ia manggeni karo batana, ane ada le nipovia nabaya tona jadiana.” Tesa Totua nuada
Pade naria muni kagana nu toniasa ane mo talili Vunja supaya le masala adana (nasala vati) naria anu rapovia.
“Ngana mombine ni pobagoka ada nokeso ia ra pakagaya karo bo lenjena. Balenggana radika Tali Boko ante lui nggakayu (Ale).”
“baju ada natopa niuli moka, kae ndate (mesa) nantalili avo (Bolo Vatu), nipouka Katupa. Pade naria muni anu nipou rivamba tampa toniasa nanau (tava nggaluku), Putu nu avo (balo) ante padale njambulu.” Tambaina
Naria muni niulika Langgai Ntoniasa, ia neonggetaka ringayo nantalili vunja papitu ngganina, ribengona naria muni tona nosaka mesa ante toniasa.
“ Ane notalili vunja, kadana molonggo nta’u kamonji ante palapa nu sambulu, pade ri kope nggana langgai ntoniasa nantaka guma, ri palena nanjoko bolo vatu naria uvi nosimbayuka palapa nu pimpi.” tesana nompake baasa kaili unde.
Reporter Arman Seli
